Radio

Wo geit dat blot an:
Vadder hett en Kasten köfft,
de snacken kann.

He steit op’t Schapp,
as en anner ok.
Vadder makt: tipp!
Un denn as nich klok
da speelt se mit mol Vigelin un Fleit,
as weer dat man so ut de Luft herweiht.
Un denn snakt een. Un denn snackt twee.
Un denn ward dat en grote Snackeree.

Mal snackt en Mann. Mal snackt en Fro.
Un ümmer heet se: Radio!

Un awends, wenn ick slapen schall,
denn makt se richdig erst Krawall
mit Brummbaß, Trummel und Trumpett.
Denn speelt se all dann üm de Wett
man ümmerto - man ümmerto!
För Vadder hewwt se Angst! Jo - jo!
He drückt mal eben op den Knop:
Gliks holt se op.

Hermann Claudius
Hamborger Kinnerbok (1940)