DISSE GÖR UNDISSE SMAAK Deel 2

Wat all in so een Prövdös mit Kees sitten deit! Un wat mi bi dat Pröven infallen is, dat hett Aard! Dat gung noch wieder mit dat Erinnern. Ik bün noch in de tweed Schooljahr to rieten. Un denn weer dor de een, de mi hoog in de Kopp sitten dee. De Jung mit de dunkerbruun Ogen un swarte Haar. Bi een Utflücht sullen wi tweedübbeld tegen eenanner lopen un he harr mien Hand to faten. Dat weer för mi so… so… hach, dat was sooo moi! Man dat Glück hett nich lang anhollen. Sien Kulantjes lachen hum ut, dat he mit een Wicht gung. Dat hett hum leep argert un he leet mi stahn. Dor hebb ik woll lang an kaut. Van de Tied of an hebb ik keen Jungs mit swart Haar mehr ankeken. Dat hett anhollen, bit dat ik vullwussen weer. Dor kweem denn de Een in mien Leven un de harr heller Haar un sowat van blau Ogen…
Wieso mi dat all bi dat Kees-Pröven infallen deit? Wi harrn in School wat to eten kregen. Dat weer smaals so. Een Stuutje un een Eckje Kees. De Kees smook nett so as disse Proov van uns Koopmann. Mit so een lüttjen Probeern büst du tomal up Gedankenreis un besinnst di up Saken, de al lang in de Vergetelbook stahnt.
Dat geev ok noch anners wat. För dat mussen wi een Bumm van Huus mitbrengen. Dor sünd groot Fatten up de Schoolhoff anlevert worden. Heet Arvtensopp weer dor binnen. Wi stunnen in Riegen dorvör un leten uns wat in uns Potten doon. Dat nehm ik mit na Huus.
Heel lecker weer ok de Ssuckerlaasopp, de ik ok mit in Huus nehm. To de Tied harr ik nett een lüttjen Brör. Wenn he sien Melk hebben muss, hett Ma de Melk mit dat Pulver anröhrt.
Harrn wi de Ssuckerlaasopp up Teller, strei Ma paar Lepels van dat Melkpulver dor over. Oh, wat much ik dat geern. Bit vandag. Zuckerlaapudding ohn dat Pulver, denn fehlt mi wat.
Un up Ies is dat ok heel lecker.
©elbondo