KLAASOHM

KLAASOHM UP BÖRKUM neei
©ElkeBontjer-Dobertin

Dat Beleevnis hett vör mehr as sesstig Jahren west. Vergeten hebb ik dat bit nu nich. Mit Schüddkoppen lees ik in ´t Bladd, dat sück wat Lü upregen un unnerbinnen willen, wat al siet woll tominnst 200 Jahren Tradition up dat Eiland is: KLAASOHM un sien Gedoo. Blied bün ik, dat Börkumer Frolü FÖR dat Spektakel up Straat gahn sünd. Ik bün seker, dat „echte“ Börkumer hör Tradition hollen willen. Moten ja nich röver fahren in de Tied, Lü, de nix dorvan weten un dat nich verstahn willen. Na ja, dat mit dat Kohhoorn kunn villicht wat sinniger angahn. Man dat hört dorto!

„Du dürst Di dat ja nich weten laten.“ Ik hebb Atze dat toseggt, dat ik nüms verraden wull, dat HE een van de middelste Klaasohms weer. Hebb ik ok nich daan. Nüms sull dat to weten kriegen, well de Börkumer Jungs utkieken, de Klaasohms to wesen. Dat gifft de grote Klaasohm, de middelste, de lüttje (van elks twee) un dat Wiefke för elke Klaasohm. Un elke Trupp hett noch weer Fangers. De jagen junge Frolü achteran, hollen hör fast un de Klaasohms poleern mit groot Kohhoorns dat Achterdeel van de Frolü un Wichter, de dat Pech hebben un hör in de Griffels raken. Siet dat de Börkumers up Walfang gahn weern, gifft dat dit Gedoo an de Avend vör Nikolausdag, word d´r seggt.
Un ik hebb dat huutnah mitkregen.
Atze was een van de Jungse, de mi up de Plaats helpen deen, wor ik dotieds leven dee. Mit Trüggeln un Bedeln harr ik rutkregen, dat he een van de middelste Klaasohms wesen sull un wor he lopen dee. Elke Klaasohm hett sien egen Strecke. Wenn se sük bemöten, denn gifft ´t wat up de Ribbens. Dat Spektaktel wull ik sehn un weer middenmank all de Lü, de ok dorbi wesen wullen. Mit ´n gewaltigen Parammel kweem he an, de middelste Klaasohm mit sien Lü. As he sowat in mien Richt weer, kunn ik dat nich laten un reep hum: „Heeei, Atze!!!“
Oha. Heel fell harrn se mi to packen un ik kreeg Hau as noch sinoit nich in mien Leven. Un dat mit een Gewaltshoorn! Ik weet nich wo, man ik hebb mi lössrieten kunnt un bün as ´n Haas över Hegen un Sloten un dör Tunen utwixt. Mien Rügg harr all Klören van een Regenboog un noch ´n paar dorbi...
Harr ja nich ropen bruukt.

Hochdeutsch imTagebuch