LABSKAUS

Van Anfang of an was Labskaus dat Eten, wat dat up Schippen geev. För de Seelü weer dat wat för hör Gesunnigheid, dat se nich so licht Skorbut kregen kunnen. Un dat, wat dorto bruukt wurr, kunn sük up de Fahrten good hollen. Fleesk weer insolten, Herenks nett so, Gemüs weer inleggt. Wo dat mit de Eier weer, dat weet ik nich. Villicht hebben de Fahrenslü ja Hohner mit an Boord hatt?
Dat bruukden se to de Mahltied:

Insolten Fleesk van Rind
Tuffels
Ziepels
Water
Solt
Peper
Eier
solten Herenks
inleggt Roode Beet

Wovöl dat van elks wat west hett, kweem up de Koppen an, de de Smutje to versörgen harr.

Wenn dat nu up ´t Fastland kookt word, för een Familje ton Bispill,
denn sünd de Mengen so:

1 kg Pökelfleesk van Rind of Hackfleesk van Rind
2 kg Tuffels
2 l Water
4 Ziepels
bietje Solt
bietje Peper
Eier
2 solten Herenks
250 g inleggt Roode Beet

So word dat maakt:

Water koken
Fleesk inleggen, negentich (90) Minüten trecken laten.
Denn dat gaar Fleesk mit de rau Ziepels dör de groff Schiev van de Dördreiher dreihen.
Wenn een dat mag: De solten Herenks un Rood Beet mit dördreihen.
Dat Hackfleesk is ja al lüttjet, dat mutt woll nich mehr dördreiht worden.
Tuffels upsent koken, sünd se gaar, worden se stampt.
All mit ´n anner mit dat Fleesknatt tosamen röhren un inkoken laten, dat dat fast word.
Solt un Peper instreien un probeern.

Up en anwarmt Teller een Hupel förmen, braden Ei doröver. Tegenan liggen solten Herenks un Rood Beet.

Smakelk Eten!!!