PAASKEFÜR-SINNEERN

Stück of wat Rietsticken bruuk ik, denn brannt dat Dröggood, wat ik bieenanner harkt hebb för mien lüttje Paaskefür. De Wind puust herin in de Bült un een groot un griesen Wulk treckt över de Wall. Van achtern hebb ik de kolle Wind. Van vörn is dat warm. Ik stöhn mi up de Harksteel un bi dat Kieken in dat Für gahnt mien Gedanken up Loop.

Wovöl Paaskefür hebben hier woll al an brannen west?
Mi dücht, ik kann hör sehn un hörn, de Lü ut olle Tieden. –
Mit eernsthaftige Gesichten stahnt se bi dat Für. Nickkoppen sük to, vertellen sük wat. Schuven mit een Förk Tacken bi ´n anner: De Mannlü in hör griese Kittels bit an de Kneen, groff Manschestern-Büxens an de Been un mit Haarsocken an Foten in de Klumpen. De Frolü stahnt dorbi in hör lange Rocken. Sünd woll Fievschaften. Lange Schuden hebben se vör de Rocken bunnen. Dicke, wullen Jacken hebben se an un Schullerdoken schulen Kopp un Rügg vör de kolle Wind. Se schellen mit de Kinner, wennehr de to dicht bi dat Für an warken sünd.
De Keerls hebben hör Pool över de Ohrn trucken. Bostkloppers hebben se tüschen de Tannen of se sünd an slaatjen. Dat zierst, wenn se in dat Für spieen dont. Laterhen, wennehr dat Für runnerbrannt is, dat Kinnergoodje is in sien Butz kropen un lüstert, wat de Groten sük vertellen, sitten se warm un schulig bi Tee of Punsch in Köken bi de Fürheerd un kieken de Frolü to, wo de mit Rood Beet un Schalottenpell Eier farven.

Noch völ ehrder hebben villicht ok Germanen hier hör Fürstee hat. Anspitzt Flintstenen hett al mal een in disse Kuntrei funnen.
Hebben de Vörollen um dat Für seten, hebben Fleesk an Stocken braden of hebben dat Für blot an hatt, um dat keen Isegrim to nahde kweem, wenn se slepen?

Ik kiek in de Funken, de ut de Flamm scheten un kann mi dat good vörstellen, wo se dor seten hebben in hör Fellkleer.

Tomal hüppken mien Gedanken na Börkum, wor ik dat moiste van mien Jahren beleevt hebb. In Paasketied kwemen Jungs ut dat Dörp up de Plaats, wor ik dotieds leven dee. Mit een Spann Peer un een Kreitwagen hulp ik hör, drög Holt to sammeln. Dat brochen wi na de hoogste Dün an de Strand. Wurr de Peer dat in de Pudelsand to stur, mussen sük de Jungse mit dat Holt ofknojen. Up haast elke hoge Dün legen Bülten van Holt un savends in Schummerdüster stoken se de Paaskefürs an. De Rook truck över de See. So dicht, dat dorum dat Misthoorn hulen dee. De Lüchten van de Fürtoorn kunnen nich dör de griese Rook finnen un de Schippslü buten kunnen van dat nix sehn.

Een Rök van brannerg Holt truck ok noch annerndags dör Dün un Dörp. Un mit de Paaskedagen kweem dat Lengen na dat Wassen un Bleihen int Vörjahr.

Man nu is över mien Sinneern mien Paaskefür runner brannt. Dat word kold.
Ik haal een depen Sücht un gah in mien Huus.