SWIENKRAAM

Wi seten in een Dörp in Ungarn bi uns Gastollen up Veranda un kunnen van hier ofluren, wat sük all in de Nahberskupp un up Straat dee. Wat Lü fohren mit Rad an de Tuun langs, annern wassen lopend unnerwegens un all repen s´ van “Jo napot!”, wat dor sowat as “Moin” bedüden deit. Proten deen se ok wat mit uns Lü. Man dat kunnen wi nich verstahn. Uns hebben se anlacht un wi hebben hör mit Lachen un Wenken antert.
Stück of wat Autos sünd vörbi ruttert un denn weer ´n Settje nix mehr los. Man dor: Van wieden leet sük tomal een Knattern hören un bold was dat Moped nahdebi. Achteran hung een Anhanger. Dorup stunn fastbunden een iesdern Gestell. Ut dit Gestell gier een Swien ut un denn sachen wi, dat dor een baldadig groten Deer insperrt weer. Dat Moped harr good wat to trecken. Dat kunnst an de Motor hören un an dat Qualmeree sehn.
De Dochter van uns Gastollen kunn wat Dütsk. Man se harr dat leep stuur, to verklaren, wat dat mit dat Deer up sük harr. De sull nich na de Slachter. Dat harr ik begrepen. Man warum fohr de Keerl dat Swien denn dör de Gegend? Doch sachs nich wegen de friske Lücht?
Dat Wicht harr Krüsels vör hör Kopp stahn. Denn meen se: „Das ist Bordellschwein.“ – „Wat is dat?“ - Se versök ´t up Neei: „Bordellschwein“, sä se noch ´n mal. Ik harr mi also nich verhört, man hör Proot gung noch wieder: „Das ist Schweinemann. Der kommt zu Schweinefrau und macht Schweinekinder.“
Aha.
Up Dütsk: Dat ist de Gemeend-Hauer, de na de rusen Mutten to fahren word.
Uns Mutt brochen wi sülvst to de Hauerbuur. Dor bleev de so lang, bit dat dat Wark daan weer. För uns Kohjen kweem dotieds Buur Franzen mit sien Bull up uns Hoff, umdat de Deren to Huus Hochtied maken kunnen.

Man up de Idee, dat dit Wark wat mit Bordell to doon harr, was ik tiedlevens nich up komen. För dat hebb ik eerst na Ungarn fahren musst.
©elbondo
Übersetzung im Tagebuch