TO VÖL EIER

Pingsten weer in Sicht. Wat maak ik denn mal? Och, dat was doch moi, wenn Familje bi ´n anner kweem. De Dag kunnen se sük utsöken. Nett an docht, fell een Naricht stürt un up een Anter luurt. Kweem aber eerst nix. Hebb denn doch up Verdacht glieks inköfft. Tegen Avend sull dat Stramm Maxen geven. Also muss örnlik Schink dorher un Stückofwat Keesschieven. Ach ja, Eier dürs ik nich vergeten. So funn ok noch een Rummel Eier in de Inkoopskörv.
So.
Pingstsönndag kunn komen. Man eerst dat Toseggen van Familje. Een Deel was up Tuur, dat wuss ik woll, man de kwemen ok ja uptied weer un kunnen sük denn mellen. De anner Deel van Familje sä een bietje laat an Saterdagnamiddag, dat se keen Tied harren, se gungen mit Kulantjes langer up Tuur. Wupps. Nu seet ik dor mit mien Beck vull Tannen, beter seggt mit de Rummel Eier. Worhen nu dormit? Wenn ik nu elke Dag een dorvan eten dee, harr ik de hele Maand wat. Man is dat ok gesund? Denn full mi in, dat ik in mien vörigs Leven een heel oll Rezeptenbook van Fro Davidis (heet de Hedwig?) hatt harr, van 1800nochwat. Ik funn Rezepten mit bit to 32 Eier. Dat weer dat Hoogst. De 9-Eierkook hebb ik utprobeert un dat Rezept harr ik. Denn was ik ja al een Deel van mien Sörg quiet. Also nehm ik mi 9 Eier. Dorvan 3 up Waagschal. Wat de wegen, mutt ik an Botter of Margarin nehmen. Na dat Gewicht van 6 Eier mutt ik Mehl un Backpulver bisied stellen. Denn dat 9-Eier-Gewicht in Zucker. 1 Vanillezucker, 1 Pries Solt. Fett uplösen, ofköhlen laten. Eiwitt mit Solt un Vanillezucker stiev slaan, Zucker dorbi, denn dat Eigeel, dat Mehl mit Backpulver un denn dat ofköhlt Fett unnerröhren. Deeg in een infett un mit mahlen Nöten of Paniermehl utstreit Blick mit hoog Rand, sowat 1 Stünn bi 180 Grad backen.

Übertragung im Tagebuch